Kæri félagsmálastjóri.
Þann 1. október sl. tóku gildi lög nr. 38/2018 um þjónustu við fatlað fólk með langvarandi stuðningsþarfir. Lagasetningin var liður í fullgildingu mannréttindasáttmála
Sameinuðu þjóðanna um réttindi fatlaðs fólks. Í lögunum er lögð áhersla á að meta einstaklingsbundnar þjónustuþarfir og að hvert tilvik sé metið í samráði við þann sem í hlut á til þess að veitt þjónusta samræmist þörfum og óskum viðkomandi.
Í VII. kafla laganna er fjallað um málsmeðferð og kveðið á um að þegar ákvörðun um þjónustu er tekin skuli horft til ákvæða stjórnsýslulaga, nr.
37/1993, og hnykkt á ákveðnum þáttum, svo sem að þjónustan skuli byggð á heildarsýn og einstaklingsbundnu mati á þörfum þess sem um hana sækir og ákvörðun tekin í samráði
við hann. Nýmæli í kaflanum lúta í fyrsta lagi að frumkvæðisskyldu sveitarfélags til að upplýsa einstakling um hvaða þjónustu hann eigi rétt á, í öðru lagi um úrræði á meðan beðið er eftir að þjónusta sem hefur verið samþykkt hefjist og í þriðja lagi ber sveitarfélagi
að rökstyðja skriflega þegar umsókn er hafnað að fullu eða að hluta.
Nú eru liðnir fimm mánuðir frá gildistöku laganna og rúmir þrír mánuðir frá því að reglugerðir á grundvelli þeirra lágu endanlega fyrir. Sveitarfélög hafa því haft nokkurt svigrúm til þess að laga starfsemi sína að breyttu lagaumhverfi.
Gæða- og eftirlitsstofnun félagsþjónustu og barnaverndar (GEF) hafa borist nokkrar ábendingar vegna framkvæmdar sveitarfélaga á lögum um málefni fatlaðs fólks með langvarandi stuðningsþarfir. Ábendingarnar hafa beinst að því að á skorti
að sveitarfélögin fari eftir ákvæðum laganna um málsmeðferð. Lögin kveða m.a. á um að sveitarfélög starfræki teymi fagfólks sem metur heildstætt þörf fatlaðs einstaklings fyrir þjónustu og hvernig veita megi þjónustu í samræmi við óskir hans. Einnig lúta
ábendingarnar að frumkvæðis- og rannsóknarskyldu sveitarfélaga varðandi leiðbeiningar til umsækjenda, úrræðum á biðtíma og annarri þjónustu sem kann að vera í boði, sé ekki unnt að hefja þjónustu innan þriggja mánaða frá samþykkt umsóknar.
Samkvæmt 4. gr. laga 38/2018 hefur ráðherra eftirlit með framkvæmd laganna, þar á meðal að þjónusta, starfsemi og rekstur sveitarfélaga sé í samræmi við markmið þeirra, reglugerðir og reglur settar samkvæmt þeim. Gæða- og eftirlitsstofnun
félagsþjónustu og barnaverndar (GEF) hefur verið falið eftirlit með þeim verkefnum og þjónustu á sviði félagsþjónustu sem heyra undir ráðherra. Með vísan til ofangreinds er þess hér með farið á leit við sveitarfélagið að það upplýsi um reglur sem gilda við
móttöku og skráningu umsókna, mat á stuðningsþörf og úrræði á biðtíma.
Vinsamlegast sendið svar fyrir 14. maí.
Með góðri kveðju,
Sigríður.
|
Sigríður Jónsdóttir, framkvæmdastjóri / Managing Director
Gæða- og eftirlitsstofnun félagsþjónustu og barnaverndar / Care Quality Inspectorate for social services and child protection
Skógarhlíð 6, 105 Reykjavík, Iceland
Sími / Tel: (+354) 545 8100
www.stjornarradid.is -
Fyrirvari/Disclaimer
|
Vinsamlegast hugið að umhverfinu áður en tölvupósturinn er prentaður / Please consider the environment before printing